༄༅།།ནང་འདྲེན་འགྲེམས་ཚོགས་སྐབས་བརྒྱད་པར་ཁེ་ལས་སུམ་སྟོང་ཉིས་བརྒྱ་
ལྷག་ཙམ་ཞུགས་རྒྱུའི་གཏན་འཁེལ་བྱུང་བ།

     འདི་ག་ཚགས་པར་ཁང་དུ་ཧྲང་ཧའེ་ནས་ཟླ་10ཚེས་6ཉིན་གློག་འཕྲིན་འབྱོར་གསལ། ཉེ་དུས། ཀྲུང་གོ་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་སྐབས་བརྒྱད་པའི（གཤམ་དུ“ནང་འདྲེན་འགྲེམས་ཚོགས་སྐབས་བརྒྱད་པ”ཞེས་བསྡུ་རྒྱུ）ལུག་ལྡོག་གྲངས་རྩིས་ཉིན་30ལ་སླེབས་ཤིང་། རྒྱལ་ཁབ་དང་ས་ཁུལ་110ལྷག་ཙམ་ནས་ཡོང་བའི་ཁེ་ལས་3200ལྷག་ཙམ་འགྲེམས་ཚོགས་ནང་ཞུགས་རྒྱུའི་གཏན་འཁེལ་བྱས་པ་དང་། གན་རྒྱ་བཞག་པའི་འགྲེམས་ཁྱོན་སྨི་ངོས་གྲུ་ཁྲི་36ལྷག་ཙམ་ཟིན་པ། “གྲོགས་པོ་རྙིང་པ”དང“གྲོགས་པོ་གསར་པ”ཡིས་ཕུད་འགྲེམས་ཀྱི་བཀྲག་མདངས་འཚེར་ས་སྔོན་ལ་ཕྱིར་བསྒྲགས་བྱས་ཏེ་ཀྲུང་གོའི་ཁྲོམ་ར་ཆེ་མོར་ཡིད་ཆེས་བརྟན་པོ་ཡོད་ལུགས་མངོན་པར་བྱས་ཡོད།

     ཉིན་ཤས་གོང་། ནང་འདྲེན་འགྲེམས་ཚོགས་སྐབས་བརྒྱད་པའི་རྒྱལ་འཛུལ་འགྲེམས་རྫས་ཐོག་མ་ཧྲང་ཧའེ་ཚོགས་འགྲེམས་ལྟེ་གནས་ཀྱི་འགག་སྒོར་ཞུ་འབུལ་བདེ་བླག་བྱུང་ཞིང་འགྲེམས་རྫས་དེ་དག་འཇར་མན་གྱི་མའེ་པ་ཧེ་རྒྱས་སྤྲོས་དངོས་རྫས་ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོ་ཚད་ཡོད་ཀུང་སིའི་ཡིན་པ་རེད།

     མའེ་པ་ཧེ་རྒྱས་སྤྲོས་དངོས་རྫས་ཀུང་སི་ན་ནིང་གི་ནང་འདྲེན་འགྲེམས་ཚོགས་སྐབས་བདུན་པར་ཞུགས་ནས་བསམ་ཡུལ་ལས་འདས་པའི་ཚོང་ལས་ཀྱི་ཚད་བརྒལ་བྱུང་ཡོད། ད་ལོ་མའེ་པ་ཧེ་རྒྱས་སྤྲོས་དངོས་རྫས་ཀུང་སིས་ཤང་ཀང་དུ་ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོའི་ཀུང་སི་བཙུགས་པ་མ་ཟད། ཧྲང་ཧའེ་རུ་ཀྲུང་གོའི་ཡན་ལག་ཀུང་སི་འཛུགས་རྩིས་ཡོད་པ་རེད། ད་ལོའི་ནང་འདྲེན་འགྲེམས་ཚོགས་ལ་ཀུང་སིའི་འགྲེམས་ཁྱོན་སྨི་ངོས་གྲུ་36ནས་སྨི་ངོས་གྲུ་300བར་རྒྱ་སྐྱེད་བཏང་བ་མ་ཟད། འགྲེམས་རྫས་གྲངས་འབོར་ཡང་ལྡབ་གཅིག་འཕར་བ་དང་འབྲེལ། ཁྱད་ལྡན་འགྲེམས་ཁུལ་ཡང་མང་པོ་གསར་དུ་བསྣན་ཡོད། མའེ་པ་ཧེ་ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོའི་ལས་སྒོའི་འགན་འཁུར་བས“འགྲེམས་ཞུགས་གཞི་ཁྱོན་རྒྱ་ཆེར་བཏང་བ་ནི་ཚོང་ལས་འཐབ་ཇུས་རིམ་སྤོར་བྱས་པ་ཞིག་ཡིན་ལ། ང་ཚོ་དང་ནང་འདྲེན་འགྲེམས་ཚོགས་ཐུན་མོང་ཐོག་འཚར་ལོངས་ཡོང་བའི་ཁས་ལེན་བྱས་པ་ཞིག་དེ་བས་ཀྱང་ཡིན”ཞེས་བཤད་པ་རེད།

     ནང་འདྲེན་འགྲེམས་ཚོགས་ནི་འགྲེམས་སྟོན་གྱི་གར་སྟེགས་ཤིག་ཡིན་པ་མ་ཟད། ཁེ་ལས་ལ་གསར་གཏོད་ཀྱི་འབྲེལ་ཟམ་ཞིག་བསྐྲུན་པ་དེ་བས་ཡིན་པ་རེད།

     ནང་འདྲེན་འགྲེམས་ཚོགས་མགྱོགས་མྱུར་འཕེལ་རྒྱས་སོང་བ་དང་བསྟུན་ནས་ལོ་7རིང་སྨན་བཅོས་ཚན་རྩལ་ཁེ་ལས་མེ་ཏུན་ལི་ཡིས་འགྲེམས་རྫས་རྩེ་གྲ་30ལྷག་ཙམ་ཚོང་ཟོག་ལ་གྱུར་ཡོད།

     མེ་ཏུན་ལི་གོ་ལ་ཧྲིལ་པོའི་མཐོ་རིམ་ཙུང་ཚའེ་གཞོན་པ་དང་ཀྲུང་གོའི་ལས་སྒོའི་འགན་འཁུར་བ་ཀུའུ་ཡུས་ཧྲའོ་ཡིས“ནང་འདྲེན་འགྲེམས་ཚོགས་ཀྱི་སྒོ་དབྱེའི་ལས་སྟེགས་ལ་བརྟེན་ནས་མེ་ཏུན་ལི་ཡིས‘འགྲེམས་ཞུགས་ཚོང་པ’ནས‘མ་འཇོག་ཚོང་པའི’བར་གྱི་འཐབ་ཇུས་རིམ་སྤོར་མངོན་འགྱུར་བྱུང་བ་དང་གསར་གཏོད་ཀྱི་གྲུབ་འབྲས་དེ‘ནང་འདྲེན’ནས‘ཕྱིར་སྐྱོད’བར་གྱི་མཆོང་སྐྱོད་བྱུང་བ་བདེན་དཔང་བྱས་ཡོད”ཅེས་བཤད་པ་རེད།

     ཐོན་རྫས་འགྲེམས་སྟོན་ནས་སྐྱེ་ཁམས་འཛུགས་སྐྱོང་བྱེད་པའི་བར། ཕྱི་རྒྱལ་གྱིས་མ་འཇོག་བྱས་པའི་ཁེ་ལས་དེ་བས་མང་པོས་ནང་འདྲེན་འགྲེམས་ཚོགས་ཀྱི་ལས་སྟེགས་བརྒྱུད་ས་གནས་དེ་གའི་ཁེ་ལས་དང་ལག་གདང་སྦྲེལ་ནས་མཉམ་ལས་གསར་གཏོད་བྱེད་བཞིན་ཡོད་པ་རེད།

     འགྲེམས་རྫས་རྒྱུན་ཆད་མེད་པར་གསར་པ་ཐོན་པ་དང་མཉམ་ལས་རྒྱུན་མཐུད་རིམ་སྤོར་བྱུང་ཞིང་། ནང་འདྲེན་འགྲེམས་ཚོགས་སྐབས་བརྒྱད་པར་སྤྱི་ཁྱབ་པུའུ་དབྱི་ཐ་ལིར་གནས་པའི་ཁའེ་ཤིས་ཚོགས་པས་དབུགས་ལམ་བདེ་ཐང་དང་། མཐོང་དཀོན་པའི་ནད་རིགས། ཆེད་སྦྱོང་ཚན་ཁག་གི་སྨན་བཅོས་བཅས་ལས་སྒོ་ཁག་ཆེན་པོ་གསུམ་དུས་གཅིག་དུ་འགྲེམས་སྟོན་བྱས་ནས་ཕྱོགས་ཁག་གི་མཉམ་ལས་རོགས་ཟླ་དང་མཉམ་དུ་ཐོན་རྫས་གསར་པ་མུ་མཐུད་མགྱོགས་པོ་འདོན་རྒྱུ་ཡིན་པ་རེད།

     མིག་སྔར། ཧྲང་ཧའེ་ཡིས་གསར་གཏོད་བྱེད་ཐབས་རབ་དང་རིམ་པ་བརྒྱུད་ནང་འདྲེན་འགྲེམས་ཚོགས་སྐབས་བརྒྱད་པའི་ནང་ཞུགས་པའི་ཐབས་ལམ་དེ་བས་སྟབས་བདེ་རུ་བཏང་སྟེ་ནུས་ཤུགས་ཡོད་རྒུས་གྲ་སྒྲིག་གི་འགག་རྩའི་དུས་མཚམས་སུ་སྐྱོད་བཞིན་ཡོད། ཧྲང་ཧའེ་གྲོང་ཨུད་དང་གྲོང་ཁྱེར་སྲིད་གཞུང་གི་འགོ་ཁྲིད་གཙོ་བོས་ཙུའུ་ཀྲང་གི་འགན་འཁུར་བའི་ནང་འདྲེན་འགྲེམས་ཚོགས་གྲོང་ཁྱེར་ཞབས་ཞུ་འགན་ལེན་འགོ་ཁྲིད་ཚོགས་ཆུང་གིས་འགན་སྲུང་ཚོགས་ཆུང་22ཀྱི་ནུས་པ་སྤྱི་འདོམས་བྱས་ནས་གཙོ་གནད་ལས་འགན་ཁག་264ལ་སྐུལ་འདེད་བཏང་ཡོད། ཧྲང་ཧའེ་ཡིས“ནང་འདྲེན་འགྲེམས་ཚོགས་ཀྱི་ཞོར་ཐོན་མཉམ་འགུལ་སྲིད་ཇུས”བཏོན་ཡོད་པ་དང་། དེའི་ནང་ཚོང་དོན་དང་། ཁྲལ་དོན། སྤྱི་བདེ། འགག་སྒོ་སོགས་སྡེ་ཚན་མང་པོའི་བྱེད་ཐབས་དང་། ཧྲང་ཧའེ་ཡི་ཕུད་འགྲེམ་དཔལ་འབྱོར་3.0དང་། རྒྱལ་སྒྲོལ་ཁྲལ་སློག་གི“ཉོས་མ་ཐག་ཁྲལ་སློག འགག་སྒྲོལ་སྟབས་བདེ་ཅན་སོགས་ཚུད་ཡོད་པས་འགྲེམས་ཞུགས་ཚོང་པ་དང་སྐུ་མགྲོན་འགྲེམས་སྟོན་ནང་ཞུགས་པ་དང་ལྟ་སྐོར་བྱེད་པར་སྟབས་བདེ་ནུས་ཆེའི་ཞབས་ཞུ་བསྒྲུབས་ཡོད།