༄༅།།“མོ་རི་ཐ་ནི་ཡ་དང་ཀྲུང་གོའི་མཛའ་གྲོགས་ཀྱི་མེ་ཏོག་དེ་བས་བཀྲག་མདངས་ལྡན་པ་ཞིག་ཡོང་བར་བྱེད”

    འདི་ག་ཚགས་པར་གྱི་གསར་འགོད་པ། ཀོན་ཁེ་ཅང་། ཙོའུ་སུང་།

    ད་ལོ་ནི་ཀྲུང་གོ་དང་མོ་རི་ཐ་ནི་ཡའི་དབར་ཕྱི་འབྲེལ་བཙུགས་ནས་ལོ་ངོ་60འཁོར་བའི་ལོ་རེད། ལོ་ངོ་60ཡི་རིང་། ཀྲུང་གོ་དང་མོ་རི་ཐ་ནི་ཡ་རྒྱལ་ཁབ་གཉིས་ཀྱིས་ཐོག་མཐའ་བར་གསུམ་དུ་ཕན་ཚུན་བརྩི་འཇོག་དང་འདྲ་མཉམ་གྱི་ལྟ་སྟངས་འཛིན་ནས། འཕེལ་རྒྱས་འགྲོ་བཞིན་པའི་རྒྱལ་ཁབ་ལ་ཕན་ཚུན་ལྟ་སྐྱོང་དང་གཉིས་ཁེ་གཉིས་ཕན་གྱི་དཔེ་མཚོན་བཏོད་ཡོད། 2024ལོར། ཀྲུང་གོ་དང་མོ་རི་ཐ་ནི་ཡའི་འབྲེལ་བ་དེ་འཐབ་ཇུས་རོགས་ཟླའི་འབྲེལ་བར་མཐོར་འདེགས་བྱས་ནས་རྒྱལ་ཁབ་གཉིས་པོའི་འབྲེལ་བའི་ལེའུ་གསར་པ་བཏོད་ཡོད། ཉེ་ཆར། གསར་འགོད་པས་ཀྲུང་གོ་དང་མོ་རི་ཐ་ནི་ཡ་རྒྱལ་ཁབ་གཉིས་ཀྱིས་མཉམ་དུ་བསྐྲུན་པའི“མཛའ་གྲོགས་འདུ་འགོད”མང་པོའི་ས་ཡུལ་དངོས་སུ་བཅར་འདྲི་བྱས་པ་ཡིན། རྣམ་གྲངས་དེ་དག་གིས་ས་གནས་དེ་གའི་དམངས་ཚོགས་ལ་དངོས་དངོས་རྗེན་རྗེན་གྱི་བདེ་སྐྱིད་བསྐྲུན་པ་མ་ཟད། དཔལ་འབྱོར་དང་སྤྱི་ཚོགས་འཕེལ་རྒྱས་ལའང་སྐུལ་འདེད་བཏང་བས། དེ་ནི་ཀྲུང་གོ་དང་མོ་རི་ཐ་ནི་ཡའི་མཛའ་གྲོགས་ཀྱི་དཔང་རྟགས་སུ་གྱུར་ཡོད།

   མཛའ་གྲོགས་གྲུ་ཁ།

     “འདི་ནི་མོ་རི་ཐ་ནི་ཡ་འཛམ་གླིང་དུ་བསྐྱོད་སའི་རྒྱལ་སྒོ་རེད”

     ཀྲུང་གོ་དང་མོ་རི་ཐ་ནི་ཡའི་མཛའ་གྲོགས་གྲུ་ཁའི་འཛུལ་སྒོར། ཀྲུང་གོ་དང་། ཨ་རབ། ཧྥ་རན་སེ་བཅས་ཀྱི་ཡི་གེ་ལས་བརྐོས་པའི“མཛའ་གྲོགས་གྲུ་ཁའི”རྡོ་རིང་གྱང་དེ་ཉིད་ཉི་འོད་འོག་ཏུ་དེ་བས་བཀྲག་མདངས་ཆེ། གྲུ་ཁར་འཛམ་གླིང་ས་གནས་ཁག་ནས་ཡོང་བའི་སིལ་བླུག་ཟོང་གྲུ་དང་དོས་སྒམ་གྲུ་གཟིངས་ཁག་གྲུ་ཚུགས་མི་འདྲ་བར་ཁ་བཀག་སྟེ་དོས་སྒམ་འབེབས་འཇུག་བྱེད་བཞིན་འདུག

     དུས་རབས་གོང་མའི་ལོ་རབས་70པར་རང་བཙན་ཐོབ་ནས་ཡུན་རིང་མ་སོང་བའི་མོ་རི་ཐ་ནི་ཡ་ཡིས་རྒྱལ་ས་ནོ་ཝ་ཁ་ཆོ་ཐེ་རུ་རང་ལ་དབང་བའི་གྲུ་ཁ་ཞིག་རག་རྒྱུའི་རེ་བ་བྱེད་བཞིན་ཡོད། འོན་ཀྱང་། ཕྱོགས་མང་པོར་རྒྱབ་སྐྱོར་བྱ་རྒྱུའི་རེ་བ་བཏོན་ཡང་རོགས་རམ་བྱེད་མཁན་བྱུང་མེད། 1971ལོར། ཀྲུང་གོ་སྲིད་གཞུང་གིས་དོན་སྙིང་གལ་ཆེན་ལྡན་པའི་གྲུ་ཁ་སྐྲུན་རོགས་བྱེད་རྒྱུའི་ཐག་བཅད། ལས་གྲྭ་འདིར་མོ་རི་ཐ་ནི་ཡའི་མི་དམངས་ཀྱིས“རྒྱལ་ཁབ་ཀྱི་དཔལ་འབྱོར་རང་བཙན་གྱི་མཚོན་རྟགས”ཞེས་བརྗོད་ཀྱི་ཡོད།

     དཔལ་འབྱོར་དང་སྤྱི་ཚོགས་རྒྱུན་ཆད་མེད་པར་འཕེལ་རྒྱས་ཕྱིན་པ་བརྒྱུད། མཛའ་གྲོགས་གྲུ་ཁ་བསྐྱར་སྐྲུན་རྒྱས་སྐྲུན་བྱ་རྒྱུ་ཉིན་བཞིན་ཁ་ཚ་དགོས་གཏུགས་སུ་གྱུར། ཀྲུང་གོ་ལམ་ཟམ་ལས་གྲྭ་ཚད་ཡོད་འགན་འཁྲི་ཀུང་སིས(གཤམ་དུ“ཀྲུང་གོ་ལམ་ཟམ”ཞེས་བསྡུ་རྒྱུ)2014ལོར་གྲུ་ཚུགས་ཨང་བཞི་པ་དང་ལྔ་པ་གསར་དུ་བསྐྲུན་པར། གྲུ་ཁ་ནས་དངོས་ཟོག་འབེབས་འཇུག་བྱེད་ཚད་དེ་སྔའི་ལོ་རེའི་ཏུན་ཁྲི་90ནས་ད་ལྟའི་ལོ་རེར་ཏུན་ཁྲི་600བར་མང་དུ་ཕྱིན་ཡོད། གྲུ་ཚུགས་གསར་པ་སྤྱད་རྗེས། རྒྱལ་སྤྱིའི་མཚོ་ཐོག་སྐྱེལ་འདྲེན་གྱི་འཕེལ་ཕྱོགས་དང་དགོས་མཁོ་དང་དེ་བས་འཚམ་དུ་ཕྱིན་ཏེ། ཟོག་འདྲེན་གྲུ་གཟིངས་དེ་བས་ཆེ་བ་འཇོག་ཐུབ་པ་མ་ཟད། འབེབས་འཇུག་གི་ལས་ཆོད་ཀྱང་མངོན་གསལ་དོད་པོས་ཆེ་རུ་ཕྱིན་ཡོད།

    མཛའ་གྲོགས་གྲུ་ཁའི་གྲུ་ཁ་ལས་དོན་ཅུས་ཀྱི་ཅུས་ཀྲང་མཱ་ཧ་མུའུ་ཡིས། མཛའ་གྲོགས་གྲུ་ཁ་ནི་ཀྲུང་གོས་མོ་རི་ཐ་ནི་ཡར་རོགས་སྐྲུན་བྱས་པའི་མཚོན་རྟགས་རང་བཞིན་གྱི་ལས་གྲྭ་ཞིག་རེད། དེས་མོ་རི་ཐ་ནི་ཡའི་དཔལ་འབྱོར་རང་ཚུགས་མངོན་འགྱུར་དང་། ཚོང་དོན་འཕེལ་རྒྱས་ལ་སྐུལ་འདེད། དམངས་འཚོ་འགན་སྲུང་སོགས་ལ་ཚབ་བྱེད་ཐབས་བྲལ་བའི་ནུས་པ་བཏོན་ཡོད་པས། “ཀྲུང་གོ་ཕྱོགས་ཀྱིས་སྒེར་སེམས་མེད་པར་རོགས་སྐྱོར་ཡུན་རིང་གནང་བར་ཐུགས་རྗེ་ཆེ་ཞུ་གི་ཡིན”ཞེས་བརྗོད།

    མཛའ་གྲོགས་སྣོལ་ཟམ་གྱིས།

    “མོ་རི་ཐ་ནི་ཡ་དང་ཀྲུང་གོས་མཉམ་དུ་འཕེལ་རྒྱས་དོན་གཉེར་བྱེད་པའི་མཛའ་གྲོགས་ཟབ་མོར་གསལ་འགྲེལ་བྱས་པ”

    ནོ་ཝ་ཁ་ཆོ་ཐེ་གྲོང་ཁྱེར་ལྟེ་གནས་སུ། ཀྲུང་གོ་དང་མོ་རི་ཐ་ནི་ཡའི་མཛའ་གྲོགས་སྣོལ་ཟམ་འགྲིམ་འགྲུལ་ལམ་ཆེན་གྱི་ལྟེ་བའི་རྒྱུད་དུ་གནས་ཤིང་། ཀྲུང་གོ་ལམ་ཟམ་གྱིས་སྐྲུན་འགན་འཁུར་བའི་མོ་རི་ཐ་ནི་ཡའི་ཆེས་དེང་རབས་ཅན་གྱི་སྣོལ་ཟམ་དེ་ནི་ཀྲུང་གོས་རོགས་སྐྲུན་བྱས་པའི་མཚོན་རྟགས་རང་བཞིན་གྱི་རྣམ་གྲངས་གཞན་ཞིག་རེད།

    མཛའ་གྲོགས་སྣོལ་ཟམ་ནོ་ཝ་ཁ་ཆོ་ཐེ་གྲོང་ཁྱེར་གྱི་རྒྱལ་ལམ་གཙོ་བོ་གཉིས་ཀྱི་འབྲེལ་མཚམས་སུ་གནས་ཡོད། དེ་སྔའི་གླིང་ཕྲན་སྐོར་ཁུལ་དུ་རླངས་འཁོར་དང་འགྲུལ་པ་མང་བས་འགྲིམ་འགྲུལ་ལས་འཛོལ་ཡང་སེ་ཐོན་གྱི་ཡོད་ལ། རླངས་འཁོར་མང་པོ་འགགས་ནས་ལུས་ཀྱི་ཡོད། མཛའ་གྲོགས་སྣོལ་ཟམ་ལ་ཕྱོགས་གཉིས་སུ་སྐྱོད་སའི་འཁོར་ལམ་བཞི་ཇུས་འགོད་བྱས་ཡོད་པ་དང་། ཀྲུང་གོའི་གཞུང་ལམ་ཟམ་པའི་རིམ་པ་དང་པོའི་ཚད་གཞི་ལྟར་བསྐྲུན་ཞིང་། ད་ལོའི་ཟླ་5ཚེས་15ཉིན་ལས་མཇུག་འགྲིལ་བ་རེད། མཛའ་གྲོགས་སྣོལ་ཟམ་བསྐྲུན་རྗེས། ས་གནས་དེ་གའི་འགྲིམ་འགྲུལ་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་ནས་དམངས་ཚོགས་ཀྱི་འགྲོ་སྐྱོད་ལ་སྟབས་བདེ་བསྐྲུན་ཡོད།

   མོ་རི་ཐ་ནི་ཡའི་སྒྲིག་ཆས་དང་སྐྱེལ་འདྲེན་པུའི་པུའུ་ཀྲང་ཨའེ་ལེ་ཧྥེ་ལེ་ཁའེ་ཡིས། “ཀྲུང་གོ་སྲིད་གཞུང་དང་མི་དམངས་ཀྱིས་ང་ཚོའི་རྨང་གཞིའི་སྒྲིག་བཀོད་འཛུགས་སྐྲུན་ལ་ཆུ་ཚད་མཐོ་བ་དང་སྤུས་ཚད་མཐོ་བའི་རྒྱབ་སྐྱོར་གནང་བར་ཐུགས་རྗེ་ཆེ་ཞུ་གི་ཡིན། མཛའ་གྲོགས་སྣོལ་ཟམ་ནི་རྒྱལ་ཁབ་གཉིས་དབར་ཕྱི་འབྲེལ་བཙུགས་ནས་ལོ་ངོ་60འཁོར་བའི་ཕྱག་རྟགས་རྩ་ཆེན་ཞིག་ཡིན་ཞིང་། དེས་མོ་རི་ཐ་ནི་ཡ་དང་ཀྲུང་གོས་མཉམ་དུ་འཕེལ་རྒྱས་དོན་གཉེར་བྱེད་པའི་མཛའ་གྲོགས་ཟབ་མོར་གསོན་ཉམས་དོད་པོས་གསལ་འགྲེལ་བྱས་ཡོད”ཅེས་བརྗོད།

   “མཛའ་གྲོགས”རིམ་སྤེལ་ལས་གྲྭས།

     “མོ་རི་ཐ་ནི་ཡ་ཕྱོགས་ཀྱི་དཔལ་འབྱོར་འཕེལ་རྒྱས་ལ་འཕྲད་པའི་འགྲན་སློང་ལ་ཁ་གཏད་གཅོག་རོགས་བྱས་པ”

    ནོ་ཝ་ཁ་ཆོ་ཐེ་ལྷོ་རྒྱུད་ཀྱི་ཨ་ལཱ་ཧྥ་དམིགས་བསལ་ཁུལ་དུ་དེང་རབས་ཀྱི་སྨན་ཁང་ཞིག་ཡོད་པ་དེ་ནི་མོ་རི་ཐ་ནི་ཡའི་མཛའ་གྲོགས་སྨན་ཁང་རེད། སྨན་ཁང་དེ་2010ལོར་སྤྱོད་འགོ་ཚུགས་རྗེས་ས་གནས་དེ་གའི་སྨན་བཅོས་ཐོན་ཁུངས་ཁ་ཐང་བའི་གནས་ཚུལ་ཐག་གཅོད་ནུས་ལྡན་ཐུབ་ཡོད། ད་ལོའི་ཟླ་བ་3པར། མོ་རི་ཐ་ནི་ཡར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་དང་མོ་རི་ཐ་ནི་ཡའི་འཕྲོད་བསྟེན་པུའུ་གཉིས་ཀྱིས་མཛའ་གྲོགས་སྨན་ཁང་བསྐྱར་སྐྲུན་རྒྱས་སྐྲུན་གྱི་ལས་གྲྭའི་བརྗེད་ཐོར་མིང་རྟགས་བཀོད་ནས། མཛའ་གྲོགས་སྨན་ཁང་ལ་དོད་དྲག་ཁང་དང་། བུད་མེད་དང་བུ་བཙའི་ཚན་ཁག གསང་རྒྱུད་ཟགས་གཤེར་དང་གཅིན་སྙི་ཟག་ཁུའི་ཚན་ཁག་སོགས་ཚན་ཁག་མང་པོ་འཛུགས་རྒྱུ་མ་ཟད། སྨན་ཁང་ལའང་འབྲེལ་ཡོད་སྨན་བཅོས་སྒྲིག་ཆས་རོགས་སྐྱོར་བྱ་རྒྱུ་རེད།

    མོ་རི་ཐ་ནི་ཡར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཐང་ཀྲུང་ཏུང་གིས། མིག་སྔར་ཀྲུང་གོས་སྤུས་ཚད་མཐོ་བའི་འཕེལ་རྒྱས་ལ་བརྟེན་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་ཕྱོགས་ཡོངས་ནས་སྐུལ་འདེད་གཏོང་བཞིན་ཡོད། ཀྲུང་གོ་ཕྱོགས་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་གྲུབ་འབྲས་གསར་པར་བརྟེན་ཏེ། མོ་རི་ཐ་ནི་ཡའི་འཕེལ་རྒྱས་ལ་གོ་སྐབས་གསར་པ་སྦྱིན་པ་དང་རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་ནས། དུས་རབས་གསར་པའི་ཀྲུང་ཧྥེའི་ལས་དབང་གཅིག་མཐུན་ཚོགས་པ་མཉམ་དུ་སྐྲུན་ཆེད་དགེ་མཚན་ལྡན་པའི་ལེགས་སྐྱེས་ཕུལ་ཡོད་ཅེས་བརྗོད།

    (འདི་ག་ཚགས་པར་ཁང་དུ་ནོ་ཝ་ཁ་ཆོ་ཐེ་ནས་འབྱོར་བའི་གློག་འཕྲིན་གཞིར་བཟུང)